You are here

BMT-nin Əhali Fondunun Azərbaycan üzrə ölkə nümayəndəliyi fəaliyyətə başlamasının 25-ci ildönümünü qeyd edir. Bu münasibətlə cari ilin sentyabr ayının 27-də Fondun ölkə ofisi Bakı şəhərində yüksək səviyyəli rəsmi qəbul təşkil edib. 

Qəbulda BMT-nin Əhali Fondunun ötən dövr ərzində ölkədə fəaliyyətinə dəstək olmuş və mühüm töhfələr vermiş tərəfdaşları – rəsmi şəxslər, dövlət strukturlarının rəhbər şəxsləri və nümayəndələri, ölkəmizdə akkreditə olunmuş diplomatik korpusun və beynəlxalq təşkilatların təmsilçiləri, iş adamları, ictimai xadimlər, vətəndaş cəmiyyəti və media nümayəndələri iştirak edib.

Tədbiri giriş sözü ilə açan Azərbaycan Respublikasının Baş nazirinin müavini Əli Əhmədov vurğulayıb ki, Azərbaycan hökuməti BMT-nin Əhali Fondu ilə çox səmərəli əməkdaşlıq tarixçəsinə malikdir. Təşkilatın Azərbaycan hökumətinə demoqrafiya və əhali sakinliyinin inkişafı sahəsində əhəmiyyətli dəstək verdiyini vurğulayan Ə.Əhmədov hökumətin dəlillərə əsaslanmış etibarlı məlumatlarla təmin olunması baxımından Fondun fəaliyyətini yüksək qiymətləndirib.

“Azərbaycan hökuməti ilə 25 illik əməkdaşlığı ərzində BMT-nin Əhali Fondu milli inkişaf məqsədlərinə töhfə verməklə ölkədə Əhali və İnkişaf üzrə Beynəlxalq Konfransın gündəliyinin icrasına nail olmaq üçün vətəndaş cəmiyyəti, özəl sektor və digər tərəfdaşları ilə səylərini birləşdirə bilmişdir”, - deyə BMT-nin Azərbaycandakı Rezident Əlaqələndiricisi Qulam İsakzai öz açılış nitqində qeyd edib. 

Tədbirə qonaq qismində qatılan BMT-nin Əhali Fondunun Azərbaycan üzrə ölkə direktoru Karl Kulessa çıxış edərək BMT-nin Əhali Fondunun fəaliyyətində mühüm çərçivələrdən biri olan, 25 il öncə Misirin Qahirə şəhərində keçirilmiş Əhali və İnkişaf üzrə Beynəlxalq Konfransda (ICPD) qəbul edilmiş Fəaliyyət Proqramının əhəmiyyətindən danışıb. Bu ilin noyabr ayında Keniyanın paytaxtı Nayrobidə təşkil ediləcək “ICPD-25” Sammiti haqqında məlumat verən natiq sözügedən proqramın hədəflərinə nail olmaq məqsədilə qlobal və ölkə səviyyəsində bütün maraqlı tərəfləri daha sıx əməkdaşlığa çağırıb.

Tədbirin gedişatında BMT-nin Əhali Fondunun Azərbaycan nümayəndəliyi tərəfindən səmərəli və məhsuldar əməkdaşlığa görə fərqlənmiş tərəfdaşlarına xüsusi təşəkkür elan edilib.

Sonda iştirakçılar xatirə şəkli çəkdirib, BMT-nin Əhali Fondunun ölkədə həyata keçirdiyi fəaliyyətə dəstək nümayişi olaraq qarşıdan gələn Nayrobi “ICPD-25” Sammitinin əsas hədəfləri altında imzalarını qoyublar.   

Qeyd edək ki, BMT-nin Əhali Fondu reproduktiv sağlamlıq və hüquqlar üzrə ixtisaslaşan aparıcı BMT agentliyidir. Azərbaycanda fəaliyyət göstərdiyi 25 il ərzində təşkilat əhalinin cinsi və reproduktiv sağlamlıq və hüquqların təmin edilməsi, ailə planlaşdırılması, gender zorakılığı və gender əsaslı cinsi ayrı-seçkiliyin aradan qaldırılması, qadınların səlahiyyətləndirilməsi, demoqrafik inkişaf və əhali sakinliyi, gənclərin iştirakçılığı və s. sahələr üzrə hökumət, özəl və ictimai sektordan olan tərəfdaşları ilə birgə əməkdaşlıq şəraitində müxtəlif uğurlu layihə və kampaniyalar həyata keçirmişdir.

Cari il BMT-nin Əhali Fondunun tarixində bir sıra mühüm və əlamətdar hadisələrlə zəngindir. Belə ki, əsası 1969-cu ildə qoyulmuş Fondun bu il qlobal miqyasda fəaliyyətə başlamasından 50 il, Fondun da təşəbbüsü ilə 1994-cü ildə Qahirədə keçirilmiş Əhali və İnkişaf üzrə Beynəlxalq Konfransdan isə 25 il keçir.