You are here

Birləşmiş Millətlər Təşkilatının (BMT) Azərbaycandakı nümayəndəliyi tərəfdaşları ilə birgə gender-əsaslı zorakılığa (GƏZ) qarşı 16 Günlük Fəallıq kampaniyasına start verir.

Builki kampaniya Dağlıq Qarabağ və ətraf bölgələrdə baş vermiş silahlı münaqişənin, eləcə də COVID-19 pandemiyasının qadın və qızların həyatına birgə mənfi təsirinin aradan qaldırılmasına töhfə vermək yolu ilə gender-əsaslı zorakılığın qarşısının alınmasına yönəldilib. 

Mövcud dəlillər deməyə əsas verir ki, münaqişənin təsirinə məruz qalmış bölgələrdə yaşayan qadın və qızlar psixoloji travmaya məruz qalma, məcburi köçkünlük, dolanışıq mənbələrinin itirilməsi və ən əsası GƏZ-lə əlaqəli mövcud xidmət təminatı kanallarının normal fəaliyyətinin pozulması da daxil olmaqla  gender-əsaslı zorakılığa məruz qalma baxımından ən həssas əhali qruplarından birini təmsil edirlər. Sadalanan problemlərin qarşılıqlı təsiri münaqişənin fəsadlarına düçar olmuş qadın və qızları pandemiya şəraitində özünütəcrid, elementar sanitar-gigiyena və tibbi vasitələrə çıxış imkanlarının məhdud olan əhalinin sıx olduğu bölgələrdə yaşamağa məcbur edir, bu isə üzləşdiyi bütün digər çətinliklər arasında onların COVID-19-a yoluxma riskini, eləcə də pandemiyadan irəli gələn digər riskləri də artırmış olur.  

Builki 16 Günlük Fəallıq kampaniyası çərçivəsində BMT-nin Azərbaycandakı nümayəndəliyi münaqişənin fəsadlarının aradan qaldırılması istiqamətində hökumətin cavab tədbirlərini dəstəkləyərək qadınlar üçün nəzərdə tutulan gigiyena ləvazimatları və COVID-19-la əlaqəli fərdi qoruyucu vasitələrdən ibarət 400-dək yardım dəstinin tədarükünü və məcburi köçkün düşmüş qadınlara çatdırılmasını həyata keçirmək məqsədilə öz tərəfdaşları ilə səylərini bir araya gətirir. Sözügedən yardım dəstlərinin Ağdam və Tərtərdə müvəqqəti məskunlaşmış qadınlara paylanması nəzərdə tutulur. Bu dəstlər vasitəsilə həmçinin münaqişənin fəsadlarına məruz qalmış qadın və qızlara gender-əsaslı zorakılıqla əlaqədar mövcud müdafiə və dəstək mexanizmləri, eləcə də BMT və Azərbaycan hökumətinin birgə əməkdaşlığı çərçivəsində ərsəyə gəlmiş GƏZ-ə qarşı üçrəqəmli qaynar xətt barədə məlumatlar təqdim olunacaq. 

Kampaniyanın davam edəcəyi günlər ərzində BMT-nin Azərbaycandakı nümayəndəliyinin strukturuna daxil olan agentliklərin və tərəfdaş qurumların sosial media kanalları, eləcə də radio və televiziyalar vasitəsilə gender-əsaslı zorakılıqdan mövcud müdafiə mexanizmləri barədə məlumatlılığın artırılması nəzərdə tutulur. 

Gender-əsaslı zorakılığa qarşı 16 Günlük Fəallıq kampaniyası hər il bütün dünyada 25 noyabr (Gender-Əsaslı Zorakılığa qarşı Beynəlxalq Mübarizə Günü) və 10 dekabr (Beynəlxalq İnsan Hüquqları Günü) tarixləri arasında baş tutur. Azərbaycanda sözügedən kampaniya ənənəvi olaraq BMT-nin Azərbaycandakı nümayəndəliyi və Azərbaycan Respublikasının Ailə, Qadın və Uşaq Problemləri üzrə Dövlət Komitəsinin birgə iştirakı ilə həyata keçirilir.